Türkiyə hökuməti İzmir və İstanbulda gözlənilən güclü zəlzələlər əleyhinə tədbirlər planlaşdırıb.

Bu barədə Ekologiya və şəhərsalma naziri Murat Kurum xəbər verib.

Onun sözlərinə görə, İstanbulda zəlzələ üçün riskli görülən binalar boşaldılaraq əvvəlcədən müəyyən edilmiş ərazilərə köçürüləcək.

Eyni zamanda Yıldız Texniki Universitetinin professoru Doktor Əli Koçak bunun təxminən 100-150 min bina olduğunu qeyd edib.

“İstanbul Böyükşəhər Bələdiyyəsinin sədri İstanbulda 90 minə yaxın riskli binanın olduğunu bildirib. Biz tamamilə söküləcək binaların sayını 50-60 min hesab edirdik. Hazırda riskli ərazilərə baxdığımızda Beylikdüzü, Bakırköy, Üsküdar, Tuzla, Pendik, Kadıköy, Fatih və Büyükçekmecenin sahilyanı əraziləri var.

Təhlükəsiz zona adlandıra biləcəyimiz yerlər siyahısına isə Esenyurt, Başakşehir, Eyüp, Şişli, Silivri, Sarıyer, Çekmeköy və Beykoz daxildir. Əslində Sarıyerdə də çoxlu qeyri-qanuni tikili var və onlar çox risklidir”, - deyə o bildirib.

Mənbə: Direniş Haber