ƏƏSMN, Nizami RİH və ƏMDX-nın kollektiv mənzil korrupsiyası...

"Azərbaycan Respublikasında ən yüksək və birbaşa hüquqi qüvvəyə malik olan Qanunun Azərbaycan Respublikasının Konstitusiyasının olduğunu Ana Qanunun 147-ci maddəsi təsbit edir. Yəqin ki, Əmək və Əhalinin Sosial Müdafiəsi Nazirliyində (ƏƏSMN ) də bunu bilməmiş olmazlar. Ən azı, nazir Sahil Babayev hüquq üzrə fəlsəfə doktorudur, neçə il ölkənin qanunverici hakimiyyət orqanında çalışıb". Bu barədə DİA.AZ-a göndərilən məqalədə deyilir.

Məqalədə daha sonra bildrilir: "Yəni, ƏƏSMN sistemində ALİ QANUNUN və QANUN ALİLİYİNİN hüquqi yöndən hakim olmadığından danışmaq yersizdir. Faktiki olaraq isə ƏƏSMN ayrı-ayrı məmurların şifahi göstərişlərinin “ən yüksək hüquqi qüvvəyə malik olması” ilə ad çıxarmaqdadır. Pensiyaçıların məhkəmə qaydasında müəyyən edilən sosial təminat hüququna audit və daxili nəzarət şöbəsinin müdiri Heybət İmanovun , mənzil təminatı hüququna isə DSMF-in keçmiş sektor müdiri, 3 aydır yeni yaradılan Sosial Xidmətlər Agentliyi publik hüquqi şəxsin idarə heyətinin sədri təyin olunan Vüqar Behbudovun qadağa qoymasından şikayətlər səngimir. Belə təsəvvür yaranır ki, beynəlxalq hüquq doktoru olan nazirin rəhbəri olduğu qurumda ya QANUN ALİ DEYİL, ALİ QANUN HANSISA MƏMURDUR, ya da rəhbərliyin MƏMURUN QANUN OLMASINDAN XƏBƏRİ YOXDUR. Hər iki variant nazirə və nazirliyə haqq qazandırmasa da, daha çox birinci variantın ƏƏSMN -də hökmranlıq etdiyi qənaətinə gəlmək olar. Bu versiyanı nazirin özünün də vətəndaşların konstitusion müraciət etmək və qəbul olunmaq hüququna qadağa qoyması faktı gücləndirir. Sahil Babayevin nazir kürsüsünə əyləşdirilməsi ilə qəbul otağının qapısına qıfıl vurulmasının 3 ili 5 aydan sonra tamam olur.

Mətləbdən uzaqlaşmayaq və Vüqar Behbudovun Qarabağ qaziləri və şəhid ailələrinin mənzillərlə təmin edilməsində qanunu, prezident fərmanını, məhkəmə qərarını, Konstitusiyanı deyil , öz şəxsi marağını , seçimini üstün tutmasını diqqətə çatdıraq. Bu məmurun (göstərişi, seçimi) dövlətdən , Konstitusiyadan o qədər “üstündür” ki, birinci şəxslərin göstərişlərini saymır. Amma bu saymazlıq nazirə onu Sosial Xidmətlər Agentliyinin sədri təyin etməyə mane olmayıb. Görünür, 1-ci vitse-prezidentin tapşırığına əsasən gözləri görməyən Qarabağ qazisini “görmək”dən imtina edən Vüqar Behbudov naziri yaxşı “görür” . Nizami rayonu, Çobanzadə küçəsində bir ildir təhvil verilən qazi və şəhid ailələrinin evlərinin bölgüsü də qanuna uyğun yox, Vüqar Behbudovun seçiminə uyğun həyata keçirilib. Belə ki, Konstitusiya, qanun, məhkəmə qərarı , fərman qalıb bir yanda, ƏƏSMN, Nizami RİH və keçmiş ƏMDK yanında Daşınmaz Əmlakın Dövlət Reyestri Xidmətinin kollektiv korrupsiya əməli ilə saxta mənzil növbəsinə dayananlar seçilib. Yəni, bir neçə mənzili olanları hazırkı İqtisadiyyat Nazirliyi yanında Əmlak Məsələləri Dövlət Xidmətinin (ƏMDX) minlərlə manat qarşılığında adlarına əmlak olmaması haqqında saxta arayışı ilə Nizami RİH minlərlə manat qarşılığında mənzil növbəsinə götürüb və ƏƏSMN yanında DSMF , hazırda Sosial Xidmətlər Agentliyi on minlərlə manat qarşılığında mənzillə təmin edib ! (?) Niyə məhz Nizami RİH -də növbədə dayananlara mənzil verilib? Çünki Vüqar Behbudov belə istəyib, mənzil yiyələrini də özü seçib. Düzdür, bir neçə nəfər nazirin mərhum atasının keçmiş “OVİR”dəki iş yoldaşları, keçmiş -indiki deputatlar da çox güman, nazir tərəfindən “seçilb” , amma “seçim”də baş rolu Vüqar Behbudovun oynaması heç kimə sirr deyil.

Bir ilə yaxındır ki, Vüqar Behbudovun “seçimi”nin Konstitusiyadan da, qanundan da məhkəmə qərarından da üstün olması özbaşınalığına PA, NK, hüquq mühafizə, ədliyyə orqanları , Ombudsman, MHŞ, Milli Məclis , Hesablama Palatası , Konstitusiya Məhkəməsinin özü hüquqi qiymət verilməsini təmin edə bilmir . Ən yaxşı halda, vətəndaşların şikayətləri qanuna zidd olaraq barəsində şikayət edilən Vüqar Behbudovun özünə göndərilir və təbii ki, bu məmurun özbaşınalığı davam edir. Qeyd etdiyimiz kimi, Vüqar Behbudov nəinki cəzalandırılır, əksinə, sektor müdirliyindən Sosial Xidmətlər Agentliyinin sədri vəzifəsinə təyin edilir!

Sahil Babayev belə kadr siyasəti ilə dövlətin və onun başçısının sosial siyasətini gözdən salmasının fərqindədirmi?"dia.az/