Əqli Mülkiyyət Agentliyinə "tender sualları": - Ata-oğulun şirkətləri necə qalib oldu?
Ötən ildən başlayaraq Prezident İlham Əliyev mobil hökumətin formalaşması istiqamətində genişmiqyaslı islahatlar apararaq bir sıra agentlik və ASC-lərin yaradılması barədə müxtəlif sərəncam və fərmanlar imzaladı. Bu sərəncamlardan biri də 2018-ci ilin aprel ayında istehlak bazarına nəzarət, standartlaşdırma, metrologiya və əqli mülkiyyət hüquqları obyektlərinin mühafizəsi sahəsində idarəetmənin təkmilləşdirilməsi ilə bağlı idi. Dövlət başçısının bu sərəncamı əksər sahibkarların heç də razı qalmadığı Standartlaşdırma, Metrologiya və Patent üzrə Dövlət Komitəsi ləğv edilərək Əqli Mülkiyyət Agentliyi yaradıldı.
Ləğv edilən Komitənin texniki tənzimləmə, standartlaşdırma, metrologiya, uyğunluğun qiymətləndirilməsi, akkreditasiya və keyfiyyətin idarə edilməsi sahəsində səlahiyyətləri Dövlət Agentliyinə, sənaye mülkiyyəti obyektlərinin mühafizəsi sahəsində səlahiyyətlərinin bütünlüklə Əqli Mülkiyyət Agentliyinə verilməsi isə bu qurumun gələcək fəaliyyətinə ölkə rəhbərliyinin böyük inamının olmasının göstəricisi idi.
Bəs görəsən Əqli Mülkiyyət Agentliyi öz fəaliyyətində bu inamı doğruldurmu? Qurum şəffaflıq prinsiplərinə nə dərəcədə əməl edir?
Agentlik ata-oğulun şirkətlərinə "Pənah" aparır?
Qaynarinfo.az olaraq Əqli Mülkiyyət Agentliyinin 2019-cu ilin may ayında keçirdiyi iki tenderə nəzər saldıq. Qeyd edək ki, Əqli Mülkiyyət Agentliyi 2019-cu ilin may ayının 14-də I lot üzrə "Əqli mülkiyyət obyektləri ilə əlaqədar xidmətlərin təmas olmadan işin təşkil edilməsi məqsədi ilə "PƏNAH" layihəsi (Patent və Əmtəə Nişanlarına Açıq Hədəf)" adlı, smetası 36500 (otuz altı min beş yüz) manat tenderin sifarişçisi olub. Bu tenderin qalibi "CSA" Məhdud Məsuliyyətli Cəmiyyəti elan edilib. Əqli Mülkiyyət Agentliyinin 2019-cu ilin may ayının 31-də "Server və növbə sistemi avadanlıqları" üzrə sifarişçisi olduğu, smetası 40440 (qırx min dörd yüz qırx) manat olan tenderin qalibi isə "BULUD STORE" Məhdud Məsuliyyətli Cəmiyyətidir.
"CSA" Məhdud Məsuliyyətli Cəmiyyəti 2015-ci ilin oktyabr ayında təsis edilib. Şirkətin qanuni təmsilçisi 1963-cü il təvəllüdlü Sadıqov Müşfiq Calal oğludur. "CSA" MMC-nin hüquqi ünvanı isə Abşeron rayonu, Fatmayı kəndi, Qara Qarayev küçəsi ev 13 ünvanıdır.
"BULUD STORE" MMC isə 2018-ci ilin iyun ayında təsis edilib. Şirkətin qanuni təmsilçisi 1992-ci il təvəllüdlü Sadıqlı Elxan Müşfiq oğlu, hüquqi ünvanı isə Abşeron rayonu, Fatmayı kəndi, Qara Qarayev küçəsi ev 13 ünvanıdır. Əqli Mülkiyyət Agentliyinin 2019-cu ilin may ayının 14 və 31-də sifarişçisi olduğu tenderlərin qalibi olan hər iki şirkət yuxarıda göründüyü kimi eyni ünvanda yerləşir. "BULUD STORE" MMC-nin qanuni təmsilçisi Sadıqlı Elxan tenderdə qalib edilən digər təşkilatın-"CSA" MMC-nin qanuni təmsilçisi Müşfiq Sadıqovun oğludur. Maraqlıdır ki, Əqli Mülkiyyət Agentliyinin 2018-ci ilin oktyabr ayında sifarişçisi olduğu "Saytın hazırlanması işləri" üzrə, dəyəri 10450 (on min dörd yüz əlli) manatlıq tenderin qalibi CSA MMC olub.
Hüquqi ünvanları eyni mənzildə və qanuni təmsilçiləri yaxın qohum (ata-oğul) olan iki şirkətin Əqli Mülkiyyət Agentliyinin 15 gün içərisində sifarişçisi olduğu, ümimilikdə 76940 manatlıq tenderlərinin qalibi olması maraq kəsb etdiyi üçün Agentlikdən məsələyə münasibət öyrəndik.
Əqli Mülkiyyət Agentliyi məsələ ilə bağlı açıqlamasında qeyd edir: ""PƏNAH” rəqəmli informasiya sisteminin yaradılmasına dair elan olunmuş kotirovka sorğusu üzrə 4 şirkətdən təklif daxil olmuşdur ("Neyron teknolocis” MMC, "TELEKOM İNVEST” MMC, "CCİ” Texnologiya MMM və "CSA” MMC). Əsas meyar kimi proqram təminatını yazacaq komanda üzvlərinin sahə üzrə peşəkarlığı, həyata keçirdikləri layihələr və sair göstəricilər nəzərə alınmaqla, Layihə üçün müəyyən edilmiş tələblərə tamamilə uyğun olan ən aşağı qiymət təklif edən "CSA” MMC şirkəti qalib elan olunmuşdur. Şirkət haqqında məlumatları www.csa.az saytından əldə etmək olar. "CSA” MMC şirkəti vaxtı ilə Agentliyin internet saytının hazırlanmasında iştirak etmişdir. Şirkət qanunvericliyin tələblərinə uyğun olaraq keçirilmiş kotirovka sorğusunun nəticələrinə əsasən qalib seçilmişdir. Əlavə olaraq bildiririk ki, qanunvericilik əvvəllər hansısa tenderdə və ya kotirovka sorğusunda iştirak etmiş və ya qalib gəlmiş şirkətin sonrakı tenderlərdə və kotirovka sorğularında iştirakına məhdudiyyət qoymur".
Tenderdə qalib olan şirkət Agentliyə yararsız avadanlıq sırımaq istəyib
"Əqli Mülkiyyət Agentliyi "Server və növbə sistemi avadanlıqları”nın alınmasına gəldikdə isə kotirovka sorğusunda 6 şirkət ("CSA” MMC, "Neyron teknolocis” MMC, "BULUD STORE” MMC, "Azericomp IT Company” MMC, "Stell Technology” MMC və "Bakinity Distribution” MMC) iştirak etmişdir. Bu kotirovka sorğusu üçün əsas meyarlar kimi təchiz olunacaq avadanlıqların parametrləri və onların qiymətləri qoyulmuşdur. Şirkətlər tərəfindən Agentliyə təqdim olunmuş içərisində qiymət təklifləri və avadanlıqların siyahısı olan bağlı və möhürlü zərflər Komissiya üzvlərinin və şirkət nümayəndələrinin iştirakı ilə açılmış və "Dövlət satınalmaları haqqında” Qanunun 44.4.1-ci maddəsinə uyğun olaraq ən aşağı qiymətli təklif seçilmiş və həmin Qanunun 37.3-cü maddəsinə uyğun olaraq, ən aşağı qiymətli təklifi vermiş "BULUD STORE” MMC qalib elan olunmuşdur.
"Dövlət satınalmaları haqqında” Qanunun 49.4-cü maddəsinə uyğun olaraq, Satınalan təşkilatın tələbatını təmin edən ən aşağı qiymət kotirovkası təqdim etmış malgöndərən - "BULUD STORE” MMC ilə müqavilə imzalanmışdır.
Yuxarıda qeyd olunanlara baxmayaraq, Agentliyin İdarə Heyətinin sədrinə işlərin gedişatı haqqında məlumat verilərkən, zərflərin açılışı zamanı digər iştirakçı şirkətlərin nümayəndələrinin bəziləri tərəfindən qalib şirkətin təklif etdiyi qiymətin orta bazar qiymətləri ilə müqayisədə aşağı olmasına dair səsləndirdikləri fikirlər də ona çatdırılmışdır. Bununla əlaqədar, Sədr tərəfindən məsələnin əlavə araşdırlıması tapşırığı verilmişdir. Onun tapşırığına əsasən qalib şirkətlə danışıqlar aparılmış, avadanlıqların texniki baxımdan yararlılığı, onların vaxtında və lazımi keyfiyyətdə təchiz olmasına dair sərt tələblər qoyulmuşdur.
Aparılan danışıqlar prosesində təklif olunan avadanlıqların köhnə nəsil avadanlıq və həm də texniki parametrlərində nasazlıq olması məlum olmuşdur. Bu səbəbdən də müqavilə öhdəliklərini yetirə bilməmələrinə görə müqavilə qarşı tərəfin məktubuna əsasən ləğv edilmişdir".
Sədr məsələni nəzarətə götürüb
"Qeyd olunmalıdır ki, sonrakı araşdırma zamanı kotirovka sorğusuna dair təkliflərin açılması zamanı müəyyən olunması mümkün olmayan və ya zərflərin açılmasından qabaq qanunvericiliklə tələb olunmayan ünvanların araşdırılması şirkətlərin rəhbərlərinin əlaqəli şəxslər olduqlarını üzə çıxarmışdır, kotirovka sorğusu prosedurunda eyni zamanda iştirak edən şirkətlərdən ikisinin - "BULUD STORE” MMC və "CSA” MMC-nin hüquqi ünvanlarının eyni və həmin şirkətlərin rəhbərlərinin yaxın qohumluq əlaqələrinin (ata, oğul) olması müəyyən olunmuşdur.
Belə halın qanunvericiliyə zidd olmamasına baxmayaraq, tərəfimizdən mənfi hal kimi qiymətləndirilmişdir. Xüsusilə vurğulamaq istərdik ki, məsələ Agentliyin rəhbərinin nəzarətindədir.
Bütün bu əsasları, həmçinin "BULUD STORE” MMC tərəfindən müqavilə öhdəliklərini yerinə yetirməkdən imtina edilməsini nəzərə alaraq, Komissiya həmin kotirovka sorğusu üzrə nəticələrin ləğv edilməsi və yeni kotirovka sorğusunun keçirilməsi barədə qərar qəbul etmişdir. Hazırda yeni kotirovka sorğusu paketi hazırlanır və yaxın günlərdə bununla bağlı müvafiq qaydada elan veriləcəkdir".
Qaynarinfo-nun sorğusundan sonra....
Göründüyü kimi, Qaynarinfo.az-ın sıravi əməkdaşının kiçik bir araşdırması və göndərdiyi sorğudan sonra Agentlik elan etdiyi tenderin nəticələrini ləğv edib. Elə isə sual yaranır, bəs Agentliyin çoxsaylı əməkdaşları, tenderlərin şəffav keçirilməsinə cavabdeh olan səlahiyyətli şəxslər niyə öz vəzifələrini layiqincə yerinə yetirmir? 76940 manatlıq katirovka sorğusunu keçirə bilməyən Əqli Mülkiyyət Agentliyi ölkədə istehlak bazarına nəzarəti, standartlaşdırmanı, metrologiya və əqli mülkiyyət hüquqlarını necə həyata keçirəcək?
Bununla belə, verilən sorğuya operativ reaksiyanı və atılan addımları da alqışlayırıq.
Mənbə: Qaynarinfo
