Belarus Parlamenti Respublika Şurasının üzvləri Azərbaycanda keçirilən növbədənkənar prezident seçkisi ilə bağlı müşahidələrinin nəticələrinə dair brifinq keçiriblər.

Mozalan.az-ın məlumatına görə, şuranın sədr müavini Valeri Belski bildirib ki, Azərbaycan dövləti hər zaman xoşməramlı qonşuluq münasibətlərinə və xalqlararası dostluq və əməkdaşlığa önəm verib:

“Bəzi dövlətlər Azərbaycan haqqında qeyri-obyektiv fikirlər səsləndirsələr də, biz bu fikirlərlə razılaşmırıq. Hesab edirəm ki, bu qələbə xalqın iradəsinin qələbəsidir”.

V.Belski qeyd edib ki, Qarabağda iki seçki məntəqəsində olublar:

“Seçki şəffaf keçirilib. Qarabağın dirçəlməsi və yenidən qurulması prosesində iştirak edənlərin seçkidə iştirakını xüsusilə vurğulamaq istəyirəm. Onlar səs verdikdən dərhal sonra öz işlərinə - Qarabağın bərpasına qayıdırdılar ki, bu da nəzərimizdən qaçmadı”.

V.Belski vurğulayıb ki, AŞPA başqa dövlətlərə, onların keçirdikləri seçki prosesinə fikir bildirir, onlara ağıl öyrətmək istəyir:

“Hesab edirlər ki, buna haqları var. Mən həmin insanları Azərbaycana dəvət edirəm”.

İlhamə Əbülfət