Rusiyanın Tuva Respublikasında şamanlar yay gündönümündə bəşəriyyətin rifahı üçün ayinlər keçiriblər.

Şamanlar Rusiya əsgərlərinin sağlamlığı və müharibədə qələbə qazanmaları üçün dua ediblər.

Bu barədə Tuvanın “Adıq-Eeren” şaman dini təşkilatının nümayəndəsi məlumat verib.

“21 iyun, saat 08:00-da Tuvada Monqun-Bulak ərazisində böyük şaman ayini keçirildi. Həmçinin Rusiyanın şamanların olduğu digər bölgələrində də ayinlər keçirilib. Bu, enerji baxımından çox güclü bir gündür. Bu gün yayın uğurlu keçməsi üçün ruhların və əcdadların dəstəyinə müraciət etmək vacib hesab olunur. Şamanlar bəşəriyyətin rifahı, əsgərlərimizin müharibədə zəfəri və sağlamlıqları üçün dua etdilər”, - deyə şamanların dini təşkilatından bildirilib.

Qurumdan verilən məlumata görə, mərasimə ruhların xeyir-duasını almaq istəyən hər kəs qatılıb.

Qeyd edək ki, şamanizmdə ilin ən uzun günü və ən qısa gecəsi ilə xarakterizə olunan yay gündönümü əsas tarixlərdən biri hesab olunur. Bu tarix insan həyatında və təbiətdə dönüş nöqtəsi sayılır. Bayram bərəkət, bolluq, şan-şöhrət, səxavət və xoşbəxtliyi təcəssüm etdirir.

Mənbə: TASS