Gürcüstan parlamenti Azərbaycanla müdafiə sahəsində sazişi ratifikasiya edib
![](/images/article/big/1686693603.7265.jpg)
Gürcüstan parlamenti “Gürcüstan hökuməti ilə Azərbaycan Respublikası hökuməti arasında müdafiə sahəsində əməkdaşlıq haqqında” sazişi ratifikasiya edib.
Bu barədə Gürcüstan parlamentinin mətbuat xidməti məlumat yayıb.
“Sazişin müəyyən etdiyi əməkdaşlıq sahələri bunlardır: hərbi təhsil, təlimlər, müdafiə və təhlükəsizlik siyasəti, NATO Sülh Naminə Tərəfdaşlıq proqramı çərçivəsində əməkdaşlıq, hərbi qanunvericilik, hərbi topoqrafiya, hərbi tibb, müdafiə kibertəhlükəsizliyi, sosial, idman və mədəni tədbirlər”, - müqavilənin şərhində deyilir.
Sənəd tərəflər arasında rəsmi səfərlər və işçi görüşlər, ikitərəfli danışıqlar, məsləhətləşmələr, təcrübə mübadiləsi, ümumi maraq doğuran məlumat mübadiləsi, konfrans və seminarlarda iştirak kimi formatlarda əməkdaşlığı nəzərdə tutur.
Qeyd edək ki, Gürcüstan və Azərbaycan arasında saziş aprel ayında Bakıda rəsmiləşdirilib. Sənədi Gürcüstan tərəfindən müdafiə naziri Cuanşer Burçuladze, Azərbaycan tərəfindən isə müdafiə naziri Zakir Həsənov imzalayıb.