İranın “Şimal-2” Dəmir Yolları İdarəsinin rəisi Qulamhüseyn Vələdi Azərbaycan Respublikası ilə ixrac, idxal və tranzit istiqamətləri üzrə dəmir yolu vasitəsilə mal mübadiləsinin 33% artdığını açıqlayıb.

Bu barədə “Azad İran” “Telegram” kanalı məlumat yayıb.

Vələdi qeyd edib ki, bu mübadilələr Astara dəmir yolu terminalı vasitəsilə həyata keçirilir.

“Bu ilin 9 ayı ərzində Astara dəmir yolu ilə aparılan mübadilələrin ümumi həcmi 498 min 926 ton olub ki, bu da ötən ilin müvafiq dövründə qeydə alınan 374 min 454 ton ilə müqayisədə 33% artıb”, - deyə o əlavə edib.

Onun sözlərinə görə, bu ilin əvvəlindən dekabrın ortalarına kimi Astara dəmir yolu terminalı vasitəsilə Azərbaycana 136 min 324 ton yük ixrac edilib ki, bu da ötən il 126 min 985 ton ixrac həcmi ilə müqayisədə yeddi faiz artım deməkdir.

“Son 9 ay ərzində Astara dəmir yolu terminalı vasitəsilə İrana 152 min 268 ton mal idxal edilib ki, bu da keçən illə müqayisədə 63 faiz artım olduğunu göstərir”, - deyə Vələdi bildirib.