”Kabel al, dirək al, utanmasalar ”işığı da özün çək” deyəcəklər”
“Evimizə gələn elektrik kabelləri köhnəlib. Dirəklər çürüyüb, az qalır aşsın. Yəni o dərəcədə köhnəlib. Göyçay Elektrik Şəbəkəsinə müraciət edirəm. Deyir, “kabeli, dirəyi al, gələk düzəldək”. Harada görülüb ki, bunları vətəndaş alsın?
Göyçayın Potu kəndinin sakini Pərvin Ömərov belə deyir. Bildirir ki, dəfələrlə buna görə Elektrik Şəbəkəsinə gedib. Hamı sözü bir yerə qoyub, eyni sözü deyirlər:
“Müdir də, satışın rəisi də deyir ki, lazım olan materialları al, düzəldək. Mənim də o qədər imkanım yoxdur axı. Ürəyimdə problem var, 10 ildən bir əməliyyat olunmalıyam. Özüm də yüksək əmək haqqı almıram. Ailə saxlayıram. Mən işıq çəkdirmək üçün lazım olan 200-300 manat pulu haradan alım? Anlayıram, hardasa hörmət etmək olar, məsələn, ustaya 20-30 manat, lap olsun 50 manat vermək olar. Ancaq 200-300 manat mənim üçün böyük məbləğdir”.
P.Ömərov deyir ki, onların məhəlləsinə yeni işıq dirəkləri basdırılıb, kabelləşmə gedib. Ancaq bir-iki nəfər pul verməyənlərin dirəkləri dəyişdirilməyib. Odur ki, bir az yağış yağan, külək əsən kimi işıqsız qalırlar:
“Özü də onu deyim ki, yaxınlığımıza qədər işıq xətti çəkilib. İstəsələr, bizə də çəkərlər, necə ki, bir çoxuna çəkiblər. Amma istəmirlər də. Mən anlamıram işıq dirəyini, işıq çəkmək üçün lazım olan kabeli niyə vətəndaş almalıdır”.
Vətəndaş işıq dirəklərinin, xətlərin köhnə olmasının onlara ziyan vurduğunu deyir:
“Həm işıqsız qalırıq, həm də bizə maddi ziyan dəyir. Dəfələrlə olub ki, elektrik cihazlarımız yanıb. Soyuducu, paltaryuyan, televizor və s. Xərcə düşmüşük. Xətlər çox köhnədir. Müəyyən bir hissəyədək öz imkanımla dəyişmişəm. Ona da bir 200-300 manatım çıxıb. Elektrik ustası çağırmışam, ona pul vermişəm, materiallara xərcləmişəm və s. Ancaq geri qalan hissəsinə pulum çatmır. Qabaqdan əməliyyatımın vaxtı gəlir, ürəkdir, ucuz da deyil. Heç bilmirəm, onu necə etdirəcəyəm, qaldı hər şeyə pul xərcləyə bilmərəm. Heç yoxdur da”.
P.Ömərov vətəndaş kimi hər yerə şikayət edib, məktub göndərib. Ancaq bugünədək bir nəticəsinin olmadığını deyir:
“Hər yerə yazmışam, ortada heç nə yoxdur. Qaz da bərbaddır, qışdır, o qədər zəifdir ki, heç evi isidə bilmirik. Bir tərəfdən də işıq sönəndə soyuqda qalırıq. Hər şey problemdir. Baxın, şalbanların çoxu çürüyüb, bərbad vəziyyətdədir. Qəzalı durumdur. Bir gün aşsa, çox pis fəsadları ola bilər”.
P.Ömərov deyir ki, onlardan pul istəmələri azmış kimi, hələ bu yaxınlarda onu cərimələmək istəyirmişlər:
“Gəldilər ki, sən kənar xətt çəkmisən. Halbuki, axtardılar, nəsə tapmadılar. Danışırlar də, bu da gəlib özlərinin çəkməyidir. Özləri quraşdırdıqları sayğacda səhv axtarırdılar, təsəvvür edirsiz? Başqa vaxt yalvarırıq, gəlib xətlərimizə baxmırlar heç. Ağac dəyir, başlayır qığılcımlanmağa. Kabel al, dirək al, utanmasalar “çıx, işığı da özün çək” deyəcəklər. Bu xətt hardasa 40 ildir var. İndiyə qədər gəlib baxan olmayıb, maraqlanmayıblar. Transfarmator da pis vəziyyətdədir. İnanın elə pis səsi gəlir ki. O partlasa, hətta evlərə təsir edəcək. İcra Hakimiyyətinə, “Azərenerji”yə, Prezident Administrasiyasına, Mehriban xanım Əliyevaya məktublar yazmışam. Heç cavab belə almamışam. Bunlar da deyirlər ki, kimə istəyirsiniz yazın, biz gəlib çəkməsək, sizə kömək olan deyil. Nəticədə çəkmirlər və bu, bizə zülmdür”.
Meydan TV məsələyə münasibət öyrənmək üçün Göyçay Elektrik Şəbəkəsi ilə əlaqə saxlayıb. Şəbəkənin baş mühəndisi Mövsüm Ağayev deyib ki, onlar heç bir vətəndaşa görüləcək işin materiallarını aldırmırlar:
“Biz heç kimə elə söz demirik. Adətən deyirik ki, ərizə ilə müraciət edin, baxaq. Əgər yeni evdirsə, Asan Xidmətə müraciət etsinlər. Yox, köhnə evdirsə, deməli, bizim abonentdir, o zaman biz baxmalıyıq. Gəlsin, yaxınlaşsın, nə problemi var, həll edək. Hamısı bizim hesabımıza olacaq”.
