10 il əvvəl iş zamanı başına hadisə gəldi, sağlamlığından oldu. Lakin çalışdığı müəssisə illərdir bunun əksini iddia edir.

Xezerxeber.az-ın məlumatına görə, Nəcibə Nuhova Zaqatala rayonunda kommunal müəssisələr kombinatında süpürgəçi kimi çalışıb.

2013-cü ilin sentyabrında iş başında olarkən onu avtomobil vurub. Elə hadisələr də bundan sonra baş verib.

Zərərçəkənin sözlərinə görə, qəzadan sonra səhhətində ciddi problemlər yaranıb. Amma pensiyası kəsildiyinə və maddi durumunun yaxşı olmamasına görə, sağlamlığının qayğısına qala bilmir.

N.Nuhova bildirib ki, qəzadan sonra iş qabiliyyətini itirib. Pensiya almaq üçün isə hadisənin iş zamanı baş verdiyi ilə bağlı ona çalışdığı müəssisədən lazımi sənəd illərdir ki, verilmir. Bununla bağlı hara müraciət etsə də, sualları cavabsız qalıb.

Məsələ ilə bağlı Zaqatala rayon kommunal müəssisələri kombinatından bildirilib ki, sözügedən şəxs 10 il əvvəl müəssisədə işləyib və təqaüdə çıxıb və lazım olan hər bir sənəd şəxsə təqdim olunub. Hazırda müəssisədə həmin şəxsə aid heç bir sənəd mövcud deyil.

Sənədlər Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin Şəki-Zaqatala regional şöbəsinə göndərilib. O ki qaldı, Nəcibə xanımın iş başında xəsarət almasına, müəssisə bu məsələni qəbul etmir.

Dövlət Əmək Müfəttişliyi Xidmətindən isə bildirilib ki, daxil olmuş məlumat əsasında bədbəxt hadisənin istehsalatla bağlılığı araşdırılmalıdır.

Ətraflı süjetdə: