Xəbər verdiyimiz kimi, bu gündən Türkiyənin İstanbul şəhərindən Azərbaycanın Gəncə və Naxçıvan şəhərlərinə təyyarə reysləri fəaliyyətə başlayır.

“Mozalan.az ” xəbər verir ki, bununla bağlı Azərbaycanın beynəlxalq hava limanları da məlumat yayıb.

Bildirilib ki, 3 iyun 2025-ci il tarixindən etibarən Naxçıvan və Gəncə beynəlxalq hava limanlarından İstanbulun Asiya hissəsində yerləşən Sabiha Gökçen Beynəlxalq Hava Limanına səyahətlər AJET aviaşirkəti tərəfindən həyata keçiriləcək.

“Uçuşlar həftədə iki dəfə – çərşənbə axşamı və şənbə günləri yerinə yetiriləcək. Yeni mərhələdə təqdim olunan bu reyslər dairəvi marşrut modeli əsasında təşkil olunub: sərnişinlər eyni uçuş nömrəsi ilə Sabiha Gökçen – Naxçıvan – Gəncə – Sabiha Gökçen marşrutu üzrə və ya əks istiqamətdə səyahət edə biləcəklər.

Bu model həm marşrutların optimallaşdırılması, həm də bir neçə şəhəri birləşdirən daha çevik və funksional uçuş imkanlarının yaradılması baxımından mühüm əhəmiyyət daşıyır.

Yeni reyslər Azərbaycanın regionlarının turizm və iqtisadi potensialının inkişaf etdirilməsinə, eləcə də sərnişinlər üçün sərfəli, rahat və fasiləsiz səyahət imkanlarının təmin olunmasına yönəlib”, - məlumatda qeyd olunub.

Reyslər və biletlərlə bağlı daha ətraflı məlumatı AJET aviaşirkətinin rəsmi internet səhifəsindən əldə etmək mümkündür: www.ajet.com.