2020-ci il oktyabr ayının 4, 5, 8, 11 və 17-də Gəncə şəhərinə edilmiş raket hücumları nəticəsində 21 dövlət mülkiyyətinə, 3 565 fiziki və 12 hüquqi şəxsə ümumilikdə xüsusilə külli miqdar təşkil edən 87.710.196 manat məbləğində qəsdən maddi ziyan vurulub.

"Report" xəbər verir ki, bu barədə 2020-ci il oktyabrın 17-də Gəncənin beşinci dəfə raket atəşinə tutulması ilə bağlı media üçün keçirilən brifinqdə çıxışı zamanı Baş Prokurorluğun İstintaq idarəsinin böyük prokuroru Şahin Osmanov məlumat verib.

"Gəncə şəhərinə hücumlar nəticəsində dövlət mülkiyyətində olan 21 daşınmaz əmlaka zərər yetirilərək 14.126.682 manat, xüsusi mülkiyyət üzrə 3 396 fiziki şəxsə məxsus 3 469 daşınmaz əmlaka zərər yetirilərək 72.407.444 manat, 85 fiziki şəxsə məxsus 92 nəqliyyat vasitəsinə zərər yetirilərək 230.168 manat, 83 fiziki şəxsə məxsus sahibkarlıq obyektlərinə zərər yetirilərək 597.350 manat, 1 fiziki şəxsə məxsus kənd təsərrüfatı obyektinə zərər yetirilərək 2 400 manat olmaqla, ümumilikdə 3 565 fiziki şəxsə məxsus daşınmaz və daşınar əmlaklara zərər yetirilərək 73.237.362 manat, 1 hüquqi şəxsə məxsus 1 daşınmaz əmlaka zərər yetirilərək 285.946,87 manat, 11 hüquqi şəxsə məxsus sahibkarlıq obyektlərinə (o cümlədən avadanlıq, alət və digər inventarlara) zərər yetirilərək 60 205 manat olmaqla, ümumilikdə 12 hüquqi şəxsə məxsus daşınmaz və daşınar əmlaklara zərər yetirilərək 346.151 manat, nəticədə xüsusi mülkiyyət üzrə ümumilikdə 3 577 fiziki və hüquqi şəxslərə məxsus daşınmaz və daşınar əmlaklara zərər yetirilərək 73.583.514 manat qəsdən maddi ziyan vurulub" , - Ş. Osmanov bildirib.

Qeyd edək ki, 2020-ci il oktyabr ayının 4, 5, 8, 11 və 17-də Gəncə şəhərinə edilən raket hücumları nəticəsində erməni silahlı qüvvələri və qanunsuz silahlı birləşmələr Gəncə şəhərində yerləşən müdafiə olunmayan ərazilərə, yaşayış məntəqələrinə, habelə hərbi hədəf olmayan, aydın görünən və fərqləndirilən təhsil və tibbi obyektlərinə, eyni zamanda mülki əhaliyə və ya döyüşlərdə iştirak etməyən ayrı-ayrı mülki şəxslərə "Smerç" və "Elbrus" tipli raketlərlə zərbələr endirərək, hərbi zərurətdən irəli gəlməyən genişmiqyaslı dağıntılara, mülki vətəndaşların xəsarət almasına və ölümü ilə nəticələnən, habelə mülki əhalinin xüsusilə külli miqdarda əmlakının məhv edilməsi ilə müşayiət olunan terrorçuluq və digər cinayətlər törədiblər.

Gəncə şəhəri üzrə 26 nəfər mülki şəxs qəsdən öldürülüb, 175 nəfər isə müxtəlif dərəcəli bədən xəsarətləri alıb. Eyni zamanda, Gəncə şəhəri üzrə ümumilikdə həlak olmuş 26 nəfərdən 10-u kişi, 10-u qadın, 6-sı isə yetkinlik yaşına çatmayan şəxslərdir. Xəsarət almış 175 nəfərin isə 61-i kişi, 66-sı qadın, 48-i isə yetkinlik yaşına çatmayan şəxslərdir.

4 oktyabr 2020-ci il tarixdə Gəncə şəhərinə edilmiş terror hücumları faktı üzrə Harutunyan Araik Vladimroviç və digərləri barəsində, Azərbaycan Respublikasının Baş Prokuroru tərəfindən Azərbaycan Respublikası CM-nin 100, 116, 117, 120, 186, 214, 218, 228, 279-cu maddələri ilə cinayət işi başlanılıb.

İstintaq zamanı qeyd olunan hadisələrin hər biri üzrə hadisə yerlərinə baxış keçirilib, həlak olmuş şəxslərin meyitlərinin tibb eksperti tərəfindən müayinəsi aparılıb, habelə xəsarət almış şəxslərin aldığı xəsarətlərə dair tibbi rəylər alınaraq iş materiallarına əlavə edilib, eyni zamanda xəsarət almış şəxslərin zərərçəkmiş şəxs qismində tanınmasına dair qərarlar qəbul edilib və sair istintaq hərəkətləri həyata keçirilib.