Gəncədə başçı müavininin açdığı “bazar” - ŞOK TƏFƏRRÜAT
Əsrlər boyu Gəncə şəhəri öz görkəmi ilə hər kəsin diqqətini cəlb edən şəhərlərdən biri olub və bu gün də şəhər öz gözəlliyini qoruyub saxlamaqdadır. Şəhərin mərkəzi küçələrində, ətraf ərazilərində yaşı yüzillərlə ölçülən ucaboyulu çinar ağaclarının varlığı, məhz bu şəhərə xüsusi gözəllik verməkdədir. 
Göygölün qoynunda yerləşməsi səbəbindən isə, yaz-yay aylarında bu şəhərin xüsusi gözəlliyi olur. Son illər ərzində şəhərdə neçə-neçə parklar inşa olunub və hər kəsin də istifadəsinə verilib. Şəhərkənarı ərazidə yerləşən bulvarda əyləncə məskənin olması, sanki ümumi gözəlliyə yeni bir gözəllik bəxş etməkdədir. Ümumi sahəsi 400 ha-dan çox olan ərazini əhatə edən və Heydər Əliyevin adını daşıyan park da, bu gün hər kəsi valeh edir. Bu park şəhər sakinlərinin, o cümlədən şəhərə gələn qonaqların təbiətlə təmasının qurulmasında sanki bir vasitədir.
Şəhərin mərkəzindəki “Xanbağı” və çoxillik ağacları ilə adı dillər əzbəri olan Sərdar xanın saldığı bağ və digər kiçik parklar, məhz gəncəlilərin təbiətə olan münasibətindən xəbər verir.
Bütün bunlara baxmayaraq, bu gün belə bir gözəlliklərə “qənim kəsilən” çoxsaylı məmurlara rast gəlmək mümkün olur. Hər kəsi incidən halın varlığı odur ki, bəzən yüksək çinli vəzifə sahibləri səlahiyyətlərini aşırlar, hətta ölkə başçısının tapşırıqlarına məhəl belə qoymurlar. Vaxtilə mərhum president Heydər Əliyevin ətraf mühitlə bağlı ifadə etdiyi kəlamlarından birini yada salaq. Məsələn, o, "Hesab edin ki, o ağacları kəsənlər mənim balalarımın başını kəsiblər" demişdi.
Gəncədə bir çox kiçik parklar ayrı-ayrı vaxtlarda salınıb və onlardan biri də, 37-ci ilin qurbanlarından olan İbrahim Abdulla oğlu Eminbəylinin adını daşıyır. Onu da bildirək ki, bu gün gəncəlilər Eminbəylinin adını daşıyan parkı vaxtilə inşa olunmuş və hal-hazırda da fəaliyyət göstərən “İzmir kababxanası”nın adı ilə tanıyırlar. 
Parkın dörd tərəfi ayrı-ayrı obyektlərin fəaliyyət göstərmələri səbəbindən zəbt ounub ki, onlardan biri də "AL market"dir. Məsələnin maraqlı tərəfi odur ki, bu obyek Gəncə şəhər İcra Hakimiyyəti başçısının birinci müavini Elnur Rzayevə məxsusdur. Bu marketin ümumi görkəminə diqqət yetirdikdə o da bəlli olur ki, obyekt parkın Nəriman Nərimanov prospekti tərəfdən giriş hissəsini tam şəkildə zəbt etmiş və çoxillik ağacların kəsilməsinə də səbəb olmuşdur. Faciə odur ki, belə bir halın varlığı Ekologiya və Təbii Sərvətlər nazirliyinin Gəncə Regional bölməsinin məsul şəxslərini heç bir halda narahat etməyib. 
Obyektin inşa olunduğu əraziyə nəzər yetirdikdə o da bəlli olur ki, həmin yerdə müxtəlif diametrili çoxillik ağaclar kəsilib. Yəni, bunları ərazidə olan və böyük diametirli kötüklərin olması ilə də sübut etmək mümkündür. Bundan əlavə, "AL market"lə üzbəüz ərazidə Elnur Rzayevə məxsus bir çox obyeklər də fəaliyyət göstərməkdədir. Elnur Rzayevə məxsus olan və xarici dillər üçün hazırlıq kursları dərsi keçmək məqsədilə inşa olunmuş obyekt isə, yolun mühafizə zolağında inşa olunub. Bu da çox böyük problemlərin əmələ gəlməsinə səbəb olmaqdadır.
Xoşagəlməz hallardan biri də odur ki, obyekt inşa olunan zaman Gəncə şəhər Memarlıq İdarəsinin əməkdaşları həm tikintiyə icazə verirlər, həm də ərazinin Eminbəyli parkına aid olmasını nəzərə almırlar. Odur ki, tarixə qısa da olsa ekskurs edək. İbrahim Abdulla oğlu Eminbəyli 1894-cü ildə Gəncə şəhərində anadan olmuş və bu şəhərdə də yaşamışdır. Onun şəcərələrindən olanlar, zaman-zaman Eminbəyli nəslinin məşhur nümayəndələri olublar. Bu şəxs (1894-1937) — 1920-ci ildə Gəncədə quberniya komissarı, Qəza İcraiyyə Komitəsinin məsul katibi, Bakıda "Kommunist" qəzetinin redaktoru, "Azərnəşr"in direktoru, Konservatoriyanın rektoru, 1937-ci ildə Mətbuatda Dövlət Sirlərini Mühafizə Edən Baş İdarənin (Qlavlitin) rəisi və Azərbaycan K(b)P MK-nın üzvü olub.
O, 1914-cü ildə pedaqoji kursu başa vurduqdan sonra, Şuşa və Gəncədə müəllimlik edir. Bir müddətdən sonra isə, bolşevik partiyasının Gəncə mahal komitəsinin üzvü və katibi (1918-1920) seçilir. Gəncə quberniya komissarı, Gəncə Qəza İcraiyyə Komitəsinin məsul katibi (1920-1922), Sovet partiya məktəbinin, S.Ağamalıoğlu adına texnikumun müəllimi (1922-1924), AKP MK mətbuat şöbəsinin müdiri, "Kəndli" qəzetinin redaktoru, Azərbaycan SSR Baş Mətbuat İdarəsinin rəisi (1924-1930), Xalq Maarif Komissarının müavini (1930-1931), "Kommunist" qəzetinin redaktoru, "Azərnəşr"in direktoru (1931-1933) və s. kimi vəzifələrdə çalışmışdır. Bu şəxs Mətbuatda Dövlət Sirlərini Mühafizə edən baş idarənin rəisi vəzifəsini daşıyarkən, onu əksinqilabçı və gizli müsavatçı adı altında həbs edirlər.
12 oktyabr 1937-ci ildə saat 17.45-də başlanan məhkəmə iclası saat 18.00-da başa çatır. (Yəni görkəmli şəxsiyyətin həyatı 15 dəqiqə içərisində həll olunub-müəllifdən) və məhkəmənin çıxarmış olduğu hökm bir gün sonra Bakıda həyata keçirilir. 1937-ci ildə onun həyat yoldaşı Firuzə Eminbəylini də həbs edirlər və ona xalq düşməninin ailə üzvü damğası vurub sürgün edirlər. Doqquz illik sürgün həyatından sonra o, 1946-cı ildə geri qayıda bilir.
P.S. Həyatda çox az yaşamış və hansısa mənfurun məkrli yanaşması səbəbindən “çırağı sönmüş” İbrahim Abdulla oğlu Eminbəylinin adını daşıyan və o qədər də böyük olmayan, həmçinin nostaloji hisslərlə dolu olan bu park, hazırda Gəncə ŞİH başçısının 1-ci müavini Elnur Rzayevin tamahı ucbatından olmazın vəziyyətə salınıb. Deyəsən ölkə rəhbəri cənab İlham Əliyevin məmur özbaşınalığı haqqında dəfələrlə səsləndirdiyi iradları, təpkiləri Elnur Rzayevə məxsus baqqalxanın tikintisinə, bu şəxsin məmur özbaşınalığına son qoymaq üçün yetərli olmayıb.
Mövzunu diqqətdə saxlayacağıq.
