Ukraynanın Donetsk vilayətinin Pokrovsk şəhərində yerləşən yaşayış binasını Rusiya ordusunun ötən gecə “İskəndər” tipli raketlə vurması nəticəsində yaralananların sayı artıb.

Donetsk vilayəti hərbi administrasiyasından verilən məlumata görə, yaralıları sayı 81 nəfərə çatıb.

09:52

Rusiya ordusunun Ukraynanın Pokrovska şəhərinə düzənlədiyi raket hücumu nəticəsində 67 nəfər yaralanıb, ölənlərin sayı yeddiyə çatıb. 

Bu barədə Ukrayna Daxili İşlər Nazirliyi məlumat yayıb.

Bildirilir ki, şəhərə bir neçə dəqiqəlik intervalla iki “İsgəndər” raketi atılıb. 

Məlumatda, həmçinin, qeyd olunur ki, yaralılardan 29-u mülki şəxs, 29-u polis, yeddi nəfər Fövqəladə Hallar Xidmətinin əməkdaşı və ikisi hərbi qulluqçudur.

Hazırda xilasedicilər ərazidəki dağıntıları təmizləməyə davam edirlər.

00:13

Rusiya hərbçiləri Ukraynanın Donetsk vilayətinin Pokrovsk şəhərinin mərkəzində yaşayış binalarına iki raket zərbəsi endiriblər.

Bu barədə vilayət administrasiyasının rəhbəri Pavel Kirilenko bildirib.

Onun sözlərinə görə, zərbələr bir neçə dəqiqəlik fasilələrlə endirilib. Hücum nəticəsində doqquz və beşmərtəbəli binalara, həmçinin digər yaşayış evlərinə, hotelə, mağazalara və inzibati binalara ziyan dəyib.

Ukrayna Prezident Aparatının rəhbəri Andrey Yermak iki nəfərin həlak olduğunu bildirib. Onun sözlərinə görə, daha dörd yaralı təcili yardım maşını ilə xəstəxanaya aparılıb.

“Rusiya terrorunu dayandırmaq lazımdır. Ukraynanın azadlığı uğrunda mübarizə aparan hər kəs insanların həyatını xilas edir. Dünyada bizimlə birlikdə Ukraynaya kömək edən hər kəs terrorçuları məğlub edəcək. Rusiya bu dəhşətli müharibədə etdiyi hər şeyə görə cavabdeh olacaq”, - Ukrayna Prezidenti Volodimir Zelenski sosial şəbəkədə hadisəni şərh edərək yazıb.

Mənbə: TV Rain