Avstraliyanın qərbində tərkibində radioaktiv sezium-137 olan kapsul itib.

Bu barədə ölkənin Radiasiya Təhlükəsizliyi Şurasının bu gün yaydığı xəbərdarlıqda bildirilir.

Məlumata görə, altı-səkkiz mm ölçülü dairəvi gümüş kapsul yanvarın 12-16-da Pert şəhərinin ətrafında Nyuman yaxınlığındakı mədəndən daşınarkən itib. O, daşınma zamanı vibrasiyadan boşalmış bolt dəliyindən düşüb. Bu, təxminən 1 400 km uzunluğunda olan magistral yolda baş verib.

Yerli hakimiyyət orqanları təkərin protektoru arasında ilişib qalma ehtimalını nəzərə alaraq sürücülərə maşınlarını yoxlamağı tövsiyə edib.

Kapsulu tapanlardan ondan beş metr aralıda durmaları, tapıntı barədə yanğınsöndürmə idarəsinə və təcili yardım xidmətlərinə məlumat vermələri tələb olunur.

Kapsulun sahibi olan “Rio Tinto” baş verənlərlə bağlı üzr istəyib.

Mənbə: İzvestiya