Sənədsiz evlərə çıxarışlar veriləcək - "Yüksək gərginlik xətləri keçən ərazilərdə..."

“Yaxın zamanlarda sənədsiz tikililərin çıxarışlarla təmin olunması prosesinə başlanılacaq”.

Bunu “Ağıllı Şəbəkə Konsepsiyası” fonunda izolyasiyalı kabel xətlərinin tətbiqininin sənədsiz evlərlə bağlı problemin həllinə mümkün təsirlərini dəyərlədirən əmlak məsələləri üzrə ekspert Mirdaməd Əzizov Yenicag.az-a açıqlamasında deyib.

Ekspert vurğulayıb ki, “Ağıllı Şəbəkə Konsepsiyası” sənədsiz evlərin qeydiyyata alınması üçün əlverişli tətbiq olacaq:

“Qeyd olunan konsepsiya yüksək gərginlikli elektrik xətlərinin yenidən izolasiyalı kabel xətləri ilə əvəz edilməsi prosesidir. Yeni xətlər bir sıra üstünlüklərə malikdir. Həmin xətlər əhalinin həyat və sağlamlığı üçün təhlükə ehtimalını tamamilə aradan qaldırır. Digər tərəfdən şəbəkənin saxlanılma xərcləri 60 faizədək azalmaqla, seçilmiş ərazi üzrə il ərzində qəza, o cümlədən planlı aşınmaların sayı 65 faizədək azalır. Texniki itkilər normativ həddə saxlanılır. Belə xətlərdə itkilər minimuma enir, əlverişsiz hava şəraitində də buzlaşmaya qarşı dayanıqlıdır. Həmçinin belə xətlərin keçdiyi ərazidə də mühafizə zolağı daha az olur. Bu isə yüksək gərginlik xətləri keçən ərazilərdə sənədsiz tikililərin qeydiyyatı zamanı əhatə dairəsinin ərazi olaraq genişlənməsinə gətirib çıxaracaq.
Hazırda qeydə alınmış 500 mindən çox sayda sənədsiz tikililər var. Sənədsiz tikililərin qeydiyyatı ilə bağlı konsepsiya hazırlanıb və konsepsiya üzrə işlər demək olar ki, yekunlaşıb. Burada sənədsiz tikililərin qeydiyyatı xarici təcrübələrdən istifadə əsasında aparılır”.