"Tesla Cybertruck" modelində istehsal keyfiyyəti ilə bağlı narahatlıqlar yenidən gündəmə gəlib. 

Mozalan.az Valyuta.az-a istinadən xəbər verir ki, şirkət və ABŞ Milli Magistral Yollar Trafik Təhlükəsizliyi İdarəsi (NHTSA), bu dəfə off-road (yolsuzluq) aksesuarı olan işıq çubuğunda aşkar edilən təhlükə səbəbilə yeni bir geri çağırma elan edib.

Məlumata görə, işıq çubuğunun bərkidildiyi hissənin boşalması nəticəsində onun avtomobildən qoparaq yola düşmə ehtimalı var. NHTSA-nın açıqlamasında bildirilib ki, bu problem bazara çıxarılan bütün "Cybertruck" avtomobillərinin təxminən 10 faizini, yəni 6 197 nəqliyyat vasitəsini əhatə edir.

Rəsmi bildirişdə qeyd olunub: “Yerindən çıxan bir işıq çubuğu yola düşərək digər avtomobillər üçün ciddi təhlükə yarada bilər və bu, qəza riskini artırır”.

NHTSA-nın açıqlamasına əsasən, "Tesla" problemi aradan qaldırmaq üçün iki mümkün üsul tətbiq edəcək: ya işıq çubuğunu ön şüşəyə xüsusi lentlə yapışdırmaqla yanaşı əlavə mexaniki bərkidici hissə quraşdıracaq, ya da yalnız həmin əlavə mexaniki bağlama elementi vasitəsilə aksesuarı sabitləşdirəcək.

Bu hadisə, 2023-cü ilin sonlarında satışa çıxarılan "Cybertruck" modeli üçün həyata keçirilən onuncu geri çağırmadır. Həmçinin bu, yalnız oktyabr ayı ərzində elan edilən ikinci belə tədbirdir.

15 oktyabrda verilən əvvəlki bildirişdə avtomobilin ön parklama işıqlarının normadan artıq parlaq olduğu müəyyən edilmişdi. Həmin problem üçün "Tesla" uzaqdan yüklənən pulsuz proqram yeniləməsi təqdim edərək məsələni həll etmişdi.

Yeni geri çağırma ilə bağlı detallı məlumatların təsirə məruz qalan avtomobil sahiblərinə 26 dekabrdan etibarən poçt vasitəsilə göndərilməsi planlaşdırılır.